Kabtanka kooxda kubadda cagta ee Manchester United, Wayne Rooney, ayaa dhaleecaynta loo soo jeediyay ku tilmaamay mid aan wax ka soo qaad lahayn.

Rooney ayaan hubin inuu booskiisa xajisan doono ciyaarta ay kooxdiisa Manchester United  Sabtida la yeelan doonto kooxda haysata horyaalka Ingiriiska ee Leicester City.

“Dhab ahaantii ma dhageysto waxa ay dadku leeyihiin, sababtoo ah qeyb badan oo ka mid ah waa wax aan wax ka soo qaad lahayn.” Wuxuu sidaasi Rooney u sheegay talefishinka Manchester United ee MUTV.

“Intaan xirfddan ku soo jiray waxaa isoo wajahay dhaleecayn haba ugu badnaato kuwo dhawaanahan la ii soo jeedinayay. Waxaan dhageystaa tababarayaasheyda, ragga aannu isku kooxda nahay iyo dadka igu xeeran.” ayuu mar kale yidhi.

Rooney waxa uu ku adkaystay in haddii uu aad u dhegaysto taageereyaasha iyo warbaahinta sida ba’an u dhalleecaynaya in aanu hore usii wadi karin xirfaddiisa iyo mustaqbalkiisa, taas daraadeedna ay tahay inuu dhinac isaga leexiyo oo uu dhegaha ka furaysto waxa laga sheegayo.