Tababaraha kooxda kubadda cagta West Ham ee Slaven Bilic ayaa u sheegay kooxaha sida weyn ugu loollamaya Dimitri Payet ee Manchester United iyo Arsenal inay iska illoobaan ciyaartoygan.

Laacibka khadka dhexe ee reer France ayaa lala xidhiidhiyey kooxo badan, gaar ahaan Arsenal, taas oo isaguna uu tibaaxay in uu xiisaynayo inuu u ciyaaro, hase yeeshee, tababare Bilic ayaa uga digay kooxahan inay isku dayaan in bisha January ay ciyaartoygan iibsadaan.

“Ma doonayno in aanu iibino, waa ciyaartoygayaga ugu wanaagsan” sidaas ayuu ku yidhi shir jaraa’id oo toddobaadle ah oo Bilic uu qabto.

Waxa uu tibaaxay in uu Payet kula jiro West Ham heshiis wakhti dheer ah oo uu damaanad qaaday inuu ku dhamaysan doono kooxda, laakiin dhibaatadu ay tahay, in ciyaaryahannada wanaagsan marka uu suuqu furmo ay kooxo waaweyni soo weeraraan.